Reabibamentu, kambio i direkshon
“Un reabibamentu di berdadero piedat entre nos ta e nesesidat di mas grandi i mas urgente.”(1) Mi tin sigur ku bo a yega di tende e sita aki. E profeta a señalá e nesesidat aki for di aña 1892 i probablemente awe, na aña 2012, e nesesidat aki ta ainda mas grandi.
Ripará ku e ta bisa: “un reabibamentu di berdadero piedat entre nos.” Ku otro palabra entre esnan ku ta profesa di ta “warda e mandamentunan di Dios i tin e testimonio di Hesus.”(2) Entre esnan ku ta prediká e mensahe di tres angel di Revelashon 14. Entre esnan ku ta warda e binida di Hesukristu, tin nesesidat di un reabibamentu di berdadero piedat. E nesesidat ta den iglesia di Dios. Dios Su yunan tin mester di un reabibamentu grandi i urgente.
Mester enfatisá tambe, ku e ta bisa: “reabibamentu di un berdadero piedat.” E nesesidat ku tin, no ta simpel piedat. Piedat ta nifiká religiosidat, deboshon, santidat, bondat, etc. Aparentemente, e kualidatnan aki ta presente i aktivo entre nos, kisas hasta na abundansia. Pero e yamada ta pa e kualidatnan aki ta presente i aktivo den un forma “berdadero.” No ta un yamada pa simpel reabibamentu di piedat. Sino di piedat berdadero, piedat real, piedat sin fingi.
E strategia ku Asosiashon a adoptá ta pa krea un struktura i espasio pa un reabibamentu di un berdadero piedat por tuma lugá i manifestá su mes den e iglesianan Adventista di Shete dia na Curaçao i Bonaire. E strategia ta hasi énfasis riba:
- Estudio di Beibel ku ta transformá bida kousando e reabibamentu i e kambio nesesario, i
- Indiká direkshon na nos iglesianan lokal pa nan por ta saludabel, i pa nan por hasi un impakto real den e komunidat.
Mi ruman, “konosiendo e tempu, ku ya ta ora pa boso lanta for di soño; pasobra awor salbashon ta mas serka nos ku tempu nos a kere.”(3) Awor mas ku nunka nos mester: Lanta! Pasobra ta ora pa bai kas. – Maranata!
1. Gospel Workers, p. 370
2. Revelashon 12: 17
3. Romanonan 13: 11
Manda bo reakshon òf pregunta na: kook@adventcb.org
|
