|
Konsilio Anual
Djarason anochi 28 yüli 2010
anochi i Djaweps 29 henter dia nos a selebrá un reunion históriko di
Asosiashon di Iglesianan Adventista na Curaçao i Bonaire. E reunion
tabata históriko pa motibu ku ta e promé reunion di tal índole. Na
e seshon di 3 i 4 di mei 2009 e delegadonan a vota un kambio den e konstitushon
eklesiástiko kaminda e konstitushon ta eksihí ku kada aña e lidernan
mester yama un reunion ku e representantenan di iglesia pa duna informe
di kon ta bayendo ku e obra den nos teritorio tantu general i den e
aspekto finansiero. Pues e reunion tabata históriko pasobra esun di e aña
aki tabata esun di promé.
E otro motibu pa
kua e reunion tabata históriko ta pasobra den e reunion ei a vota un
konstitushon ku lo duna e Asosiashon di iglesianan na Curaçao i Bonaire
un kurpa legal. Nos kier a hasi uso di e oportunidat aki pa yama danki na
tur e delegadonan ku tabata tei presente i ku a duna nan aporte i koperashon
pa por a logra e paso importante aki den e historia di nos iglesia.
Djarason anochi
nos a presentá un rapòrt di e desaroyo di e obra den nos Asosiashon i
djaweps e delegadonan a risibí mas detaye den e informe di sekretario,
tesorero i di algun departamento / ministerio. Klik pa e Informe ku a wòrdu presentá djarason
anochi.
Iglesia ta
enfrentá bastante desafio. Di e dies (10) desafionan ku nos a identifiká
den nos informe, esun di mas urgente i preokupante ta esun ku ta bisa “mas tantu miembro aktivo
kumpliendo ku e mishon.” E mandato ku Hesus a duna den Mateo 28: 18-20 ta
pa 100% di Su disipelnan. Esei ta nifiká ku tur miembro di iglesia mester
ta envolví di un manera òf otro den kumplimentu di e mishon di iglesia.
Sinembargo, e realidat ta mustra ku aktualmente tin un averahe di mas o
ménos 20% di e miembresia ku ta aktivo di un manera òf otro den nos
iglesianan lokal.
Pa e motibu ei e
dos intervenshonnan ku nos tabatin na kuminsamentu di e reunion
atministrativo tur dos dia a konsentrá riba Lukas 10:1-4. Den e pasashi
aki Hesus ta manda setenta (70) “obrero bíbliko Su dilanti pa tur stat i
lugá promé ku E mes yega einan. E ta ekspresá e echo ku “e kosecha ta mashá
grandi, ma trahadó ta poko.” Pa despues e duna e òrdu pa “pidi e Señor di
kosecha pa manda trahadó den Su kosecha. ”
E realidat di
akuerdo ku Hesus ta ku tin hopi hende kla pa asept’é komo Salbador pero trahadónan
ku ta traha ta poko. E orashon ku Ela ordená ta un orashon ku nos tur
mester hasi i dun’é pèrmit pa manda nos den Su kosecha. Ora ku nos hasi e
orashon aki ku un kurason sinsero sigur nos lo terminá den Su kosecha i
eksperenshá kosnan grandi i bon segun nos ta haña nos mes na e mihó lugá
posibel riba e mundu aki – esta den e sentro di Dios Su boluntat. Pues,
laga nos kuminsá i sigui “pidi e Señor di
kosecha pa manda trahadó den Su kosecha” pa pronto nos por terminá e
trabou ku mester wòrdu hasi pa nos bai kas. – Maranata!
Manda bo reakshon òf pregunta na: kook@adventcb.org
|
